काठमाडौँ, जेठ २३ — ऐतिहासिक महत्त्व बोकेको सुन्धारा र धरहराको संरक्षणको माग गर्दै काठमाडौँ महानगरपालिका–२२ का स्थानीयवासीको एक प्रतिनिधिमण्डलले प्रधानमन्त्री केपी शर्मा ओलीलाई भेट गरेका छन्।
प्रतिनिधिमण्डलमा वडाध्यक्ष चिनीकाजी महर्जन, नेकपा (एमाले) काठमाडौँका जिल्ला सचिव राजेश शाक्य लगायतको उपस्थिति थियो। उनीहरूले ऐतिहासिक सम्पदाको संरक्षण र त्यससम्बन्धी दीर्घकालीन योजना निर्माणमा सरकारको ध्यानाकर्षण गराएका हुन्।
प्रधानमन्त्री निवास बालुवाटारमा भएको भेटमा स्थानीयवासीले सुन्धारा क्षेत्रमा खुला बगैँचा, मुद्रा तथा भूकम्प सङ्ग्रहालय, भूमिगत पार्किङसहित नयाँ धरहराको निर्माणमा सरकारले देखाएको सक्रियता प्रति धन्यवाद व्यक्त गरे। साथै, सुन्धारामा अनवरत रूपमा बहने पानीको प्राकृतिक स्रोत र धरहराको अवशेष संरक्षण गर्ने विषयमा गम्भीर ध्यान दिन आग्रह गरे।
स्थानीयहरूको भनाइमा अनुसार, विगतमा सञ्चय कोषद्वारा गरिएको भवन निर्माणले सुन्धाराको भूमिगत जल निकास प्रणालीमा क्षति पुगेको थियो। अहिले पनि ढल प्रणालीमा अवरोध हुँदा पानी बग्न सकिरहेको छैन। यस्ता संरचनाको संरक्षण र मर्मतका लागि स्रोत अभाव रहेको जानकारी प्रधानमन्त्रीलाई दिइएको छ।
प्रधानमन्त्री ओलीले सम्पदाको संरक्षणमा संघीय सरकारबाट आवश्यक सहयोग हुने आश्वासन दिँदै काठमाडौँ महानगरपालिकाले पनि संस्थागत ढंगले सांस्कृतिक र ऐतिहासिक सम्पदाको संरक्षणमा अग्रसर हुनुपर्ने धारणा राखे।
