काठमाडौं, साउन ३ — बलिउडका सुपरस्टार शाहरुख खान आफ्नो नयाँ फिल्म ‘किङ्ग’ को छायांकनका क्रममा घाइते भएका छन्। मुम्बईको गोल्डन टोबैको स्टुडियोमा एक्शन दृश्य खिच्ने क्रममा उनी घाइते भएका हुन्।
हाल उनी अमेरिकामा उपचाररत छन्। रिपोर्टहरू अनुसार शाहरुखको मांसपेशीमा गम्भीर चोट लागेको छ जसका कारण चिकित्सकहरूले उनलाई सर्जरी गर्न सल्लाह दिएका थिए। शल्यक्रिया पछि चिकित्सकले उनलाई कम्तिमा एक महिनासम्म पूर्ण आराम गर्न भनेका छन्।
शाहरुख अभिनीत ‘किङ्ग’ फिल्मको छायांकन सेप्टेम्बर वा अक्टोबरबाट मात्र सुरु हुने बताइएको छ। यसअघि तय गरिएको जुलाई–अगस्टको सुटिङ सेड्युल रद्द गरिएको छ। फिल्मको छायांकन भारत र युरोपका विभिन्न ठाउँमा गरिने योजना छ।
यो चलचित्र सिद्धार्थ आनन्दको निर्देशनमा बन्नेछ र सन् २०२६ मा रिलिज गर्ने तयारी छ। फिल्ममा शाहरुखसँगै उनकी छोरी सुहाना खानले पनि अभिनय गर्नेछिन्। साथै दीपिका पादुकोण, अभिषेक बच्चन, रानी मुखर्जी र अनिल कपूर पनि फिल्ममा देखिनेछन्।
शाहरुख खानका लागि छायांकनको क्रममा घाइते हुनु नयाँ कुरा होइन। यसअघि ‘कोयला’ फिल्मको सुटिङका बेला उनको घुँडामा चोट लागेको थियो भने ‘रा.वन’ फिल्मका बेला पनि उनी गम्भीर चोटका कारण शल्यक्रिया गराएका थिए।
हालै उनले ‘पठान’, ‘जवान’ र ‘डंकी’ जस्ता फिल्ममा सफल अभिनय गरेका छन्। आगामी फिल्म ‘किङ्ग’ लाई लिएर दर्शकहरूमा विशेष उत्साह देखिएको छ।
