काठमाडौं, असोज ८ — काठमाडौं महानगरपालिकाले उज्यालो महानगर योजना अन्तर्गत ‘हाई मास्ट लाइट’ जडानको काम तीव्र रुपमा अघि बढाएको छ । हालसम्म १२ स्थानमा यस्ता लाइट जडान भइसकेका छन् भने बाँकी लाइट पनि दशैं अघि जडान सक्ने तयारी गरिएको छ ।
महानगर प्रमुख बालेन्द्र शाह (बालेन) ले सामाजिक सञ्जालमार्फत जानकारी दिँदै करिब १० करोड रुपैयाँको लगानीमा ६२ वटा ‘हाई मास्ट लाइट’ स्थापना गर्ने योजना अघि बढाइएको बताएका छन् । उनले अहिले जडान भएका १२ लाइटमध्ये दुईवटा राष्ट्रिय बसपार्क (नयाँबसपार्क) क्षेत्रमा राखिएको उल्लेख गरेका छन् । बसपार्क सञ्चालन गर्ने लोत्से बहुउद्देश्यीय प्रालिका मानव संसाधन प्रमुख पंकज मल्लका अनुसार बसपार्कभित्र तीन वटा ‘हाई मास्ट लाइट’ जडान गर्ने योजना भए पनि हालसम्म दुईवटा मात्रै जडान भएको छ ।
यसअघि अघिल्लो कार्यकालमै राखिएका तर काम नलाग्ने अवस्थाका दुई हजारभन्दा बढी सोलार स्ट्रिट लाइटलाई हटाएर इलेक्ट्रिकल स्ट्रिट लाइटमा परिवर्तन गरिएको छ, जसले अहिले निरन्तर उज्यालो दिइरहेको महानगरले जनाएको छ ।
महानगरपालिकाले करिब ८५ करोड रुपैयाँ लागतमा नयाँ स्ट्रिट लाइट खरिद तथा जडानको काम पनि अन्तिम चरणमा पुगेको छ । यी सबै काम सम्पन्न भएपछि काठमाडौंलाई अझ सुरक्षित, उज्यालो र आधुनिक सहर बनाउने लक्ष्य रहेको प्रमुख शाहले स्पष्ट पारेका छन् ।
