काठमाडौं, असोज ७ — नेपाली निजी विमान सेवा प्रदायक बुद्ध एयरले काठमाडौं र भारतको कोलकाताबीचको सिधा उडान आगामी अक्टोबर १९ (कात्तिक ३ गते) देखि पुनः सुरु गर्ने भएको छ ।
यो रुटमा सिधा हवाई सेवा सञ्चालन गर्ने बुद्ध एयर एक मात्र नेपाली कम्पनी हो । प्रारम्भिक चरणमा उक्त उडान हप्तामा तीन दिन आइतबार, मंगलबार र बिहीबार हुनेछ । काठमाडौंबाट बिहान ७ बजे उडान भर्ने विमान कोलकाताबाट स्थानीय समय अनुसार बिहान ९:२० बजे फर्किनेछ । यस रुटका लागि कम्पनीले एटीआर–७२ विमान प्रयोग गर्नेछ, जसले करिब १ घण्टा ३५ मिनेटमा यात्रा पूरा गर्नेछ ।
बुद्ध एयरले यात्रुहरूको सुविधा लक्षित गर्दै होलिडे प्याकेज समेत ल्याउने तयारी गरेको छ । यसमार्फत यात्रुहरूले कोलकाता भ्रमणसँगै जगन्नाथपुरी, गंगासागर र सुन्दरवन जस्ता प्रसिद्ध धार्मिक तथा पर्यटकीय स्थल अवलोकन गर्न सक्नेछन् । यी प्याकेजहरू बुद्ध एयरकै भगिनी संस्था बुद्ध होलिडेजमार्फत सञ्चालन हुनेछन् ।
कम्पनीले भारतका धार्मिक तथा सांस्कृतिक पर्यटकलाई नेपाल भित्र्याउने र नेपाली यात्रुहरूलाई भारतका गन्तव्यतर्फ सहज बनाउन कोलकाता उडान महत्त्वपूर्ण हुने विश्वास व्यक्त गरेको छ ।
हाल बुद्ध एयरले देशभर दैनिक ६० भन्दा बढी उडान गरिरहेको छ भने अन्तर्राष्ट्रिय तर्फ भारतको वाराणसीमा पनि नियमित उडान भर्दै आएको छ । यसअघि सन् २०१९ (वि.सं. २०७६) बाट काठमाडौं–कोलकाता उडान सुरु भए पनि कोभिड–१९ महामारीका कारण सेवा स्थगित गरिएको थियो ।
