काठमाडौं, साउन १७ — भियतनामको उत्तर भागमा पर्ने डिएन बिएन जिल्लामा पछिल्ला दिनहरूमा आएको बाढी र पहिरोले ठूलो क्षति पुर्याएको छ। स्थानीय प्रशासनका अनुसार, यस प्रकोपमा कम्तीमा ८ जनाको मृत्यु भइसकेको छ भने तीन जना अझै बेपत्ता छन्।
बाढीका कारण करिब ६० घरहरु बगाइसकिएको छ भने ३० वटा गाउँ बाहिरी संसारसँग सम्पर्कविहीन बनेका छन्। प्रभावित क्षेत्रबाट उद्धार र राहत कार्य तीव्र पार्न स्थानीय सुरक्षा निकाय, सेना र स्वयंसेवक गरी करिब सात सय जनालाई परिचालित गरिएको छ।
उपप्रधानमन्त्री ट्रान होङ हालले प्रभावित क्षेत्रमा अवलोकनपछि स्थानीय प्रशासनलाई तुरुन्त राहत पु¥याउन र प्रभावित सर्वसाधारणको सुरक्षा सुनिश्चित गर्न निर्देशन दिएका छन्। उनले भने, “हामीले भोकमरी, सम्पर्कविहीनता र सूचना अभाव नहोस् भनेर विशेष ध्यान दिनुपर्छ। उद्धारकर्मीहरू र पीडित सबैको सुरक्षा सबै अवस्थामा प्राथमिकता हुनुपर्छ।”
प्राकृतिक प्रकोपका कारण विस्थापित भएका परिवारहरूलाई तत्काल सुरक्षित स्थानमा स्थानान्तरण गरिरहेको छ र विभिन्न राहत सामग्री वितरण भइरहेको छ। उद्धार टोलीहरू तीव्र गतिमा बेपत्ता रहेका व्यक्तिहरूको खोजी कार्यमा जुटेका छन्।
यो बाढी र पहिरोले भौगोलिक रूपमा दुर्गम क्षेत्रहरूमा ठूलो प्रभाव पार्दा स्थानीय जनजीवन र कृषिमा पनि व्यापक क्षति भएको अनुमान गरिएको छ। सरकारी तथा गैरसरकारी संस्थाहरूले पुनर्निर्माण र राहतमा सहयोग पुर्याइरहेका छन्।
