७ असार, काठमाडौं — राष्ट्रिय स्वतन्त्र पार्टी (रास्वपा) का सभापति रवि लामिछानेले भैरहवा कारागारबाट २० पृष्ठ लामो अपिल जारी गर्दै आफूलाई षड्यन्त्रपूर्वक र प्रतिशोधका आधारमा जेल हालिएको दाबी गरेका छन्। उनले न्याय अन्ततः जनताबाट प्राप्त हुने विश्वास व्यक्त गरेका छन्।
अपिलमा लामिछानेले रास्वपाले संसद् र सरकारमा खेलेको भूमिका स्मरण गराउँदै पार्टीका थोरै सांसदहरूकै अनुपस्थितिले संसद अधुरो देखिने बताएका छन्। उनले अघिल्लो समयमा नेपाली कांग्रेसबाट प्रधानमन्त्री बन्ने प्रस्ताव आएको दाबी पनि गरेका छन्, तर स्वाभिमानका कारण त्यो प्रस्ताव अस्वीकार गरेको र आज त्यसकै मूल्यस्वरूप जेल पुगेको बताएका छन्।
लामिछानेले सहकारी प्रकरणमा तयार पारिएको १२०० पृष्ठको प्रतिवेदन आफूमाथि मात्रै बलपूर्वक कार्यान्वयन गरिएको गुनासो गरेका छन्। कानुनसम्मत रूपमा नलाग्ने मुद्दा लगाइएको भन्दै उनले गहिरो असन्तोष व्यक्त गरेका छन्। “बेथितिका वाहकलाई निवेदन गरेर विधिको शासन आउँदैन”, भन्दै उनले देशमा सुशासन स्थापनाका लागि थप संघर्षको आह्वान गरेका छन्।
