काठमाडौं, २२ असार — भोजपुरको रामप्रसाद राई गाउँपालिका–२ धोदलेखानीमा एकै परिवारका चारजनाको विभत्स हत्या भएको छ। आइतबार राति करिब १२ बजे जिल्ला प्रहरी कन्ट्रोलमा एक युवकले फोन गरी तीनजनालाई छुरा प्रहार गरेको र आफूमाथि पनि ज्यानमारा हमला भएको दाबी गरेपछि घटना बाहिर आएको हो।
प्रहरीका अनुसार घटनास्थलमा ६८ वर्षीय बेलबहादुर गिरी, उनकी पत्नी मन्जु गिरी, १६ वर्षीया छोरी र १० वर्षीय छोरा मृत भेटिए। घटनापछि भागेका ३० वर्षीय राजेन्द्र राई केही घन्टा पछि पेटमा छुरा लागेको घाइते अवस्थामा भेटिए।
प्रहरीको प्रारम्भिक अनुसन्धानले देखाए अनुसार राजेन्द्र राईको १६ वर्षीया किशोरीसँग प्रेम सम्बन्ध थियो। करीब ९ महिनासम्म उनीहरू सँगै बसेका थिए तर परिवारले सम्बन्ध स्वीकार नगरेपछि किशोरीलाई घर फिर्ता लगिएको थियो। त्यसपछि केही दिनअघि राजेन्द्र ‘श्रीमती’ लिन गएका थिए तर परिवारले दिन अस्वीकार गरेपछि विवाद भएको थियो।
राजेन्द्रले प्रहरीलाई दिएको बयानअनुसार, विवादका क्रममा परिवारले आफूमाथि आक्रमण गरेपछि प्रतिकार स्वरूप छुरा प्रयोग गरेका हुन्। तर, सबै सदस्य मृत फेला परेकाले घटनाको सत्यता पुष्टि गर्न सकिने अवस्था छैन।
राईलाई प्रारम्भिक उपचारपछि धरानस्थित बीपी कोइराला स्वास्थ्य विज्ञान प्रतिष्ठानमा रेफर गरिएको छ। प्रहरीले घटनालाई ‘सामूहिक हत्या’ को संज्ञा दिँदै विभिन्न कोणबाट अनुसन्धान गरिरहेको जनाएको छ।
