२० साउन, काठमाडौं — मंगलबारको सेयर बजार दिनभर ओरालो लागेको छ। नेप्से परिसूचक ४१.३५ अंकले घटेर २८३४.०२ बिन्दुमा झरेको छ। दिनको शुरुवातमै परिसूचक २९०५ सम्म पुगेको भए पनि त्यसपछि लगातार गिरावट आएको हो।
अघिल्लो दिनको तुलनामा कारोबार रकममा पनि कमी आएको देखिएको छ। सोमबार १० अर्ब ८२ करोड रुपैयाँ बराबरको सेयर कारोबार भएको थियो भने मंगलबार त्यो घटेर ९ अर्ब ३३ करोडमा सीमित भयो। बजारमा ४६ कम्पनीका सेयर मूल्य बढेका छन् भने २०४ कम्पनीको मूल्य घटेको छ।
बैंकिङ, विकास बैंक, हाइड्रोपावर, बीमा, उत्पादन, फाइनान्स, होटल तथा पर्यटनलगायतका अधिकांश समूहका सूचकहरू घटेका छन्। ‘अन्य’ समूह २.८३ प्रतिशतले घट्दा विकास बैंक २.५५ प्रतिशतले ओरालो लागेको छ। माइक्रोफाइनान्स समूह भने ०.५० प्रतिशतले वृद्धि भएको एकमात्र समूह हो।
कम्पनीमध्ये समाज लघुवित्त र उन्नति सहकार्य लघुवित्तको मूल्य १० प्रतिशतले बढेको छ भने थ्रीस्टार हाइड्रोपावरको मूल्य १० प्रतिशतले घटेको छ। त्यस्तै ट्रेड टावर, लुम्बिनी विकास बैंक र अपर सोलु हाइड्रो इलेक्ट्रिक कम्पनीका शेयर मूल्यमा पनि उल्लेखनीय गिरावट आएको छ।
कारोबारमा हिमालयन रिइन्स्योरेन्स, ट्रेड टावर, शिवम् सिमेन्ट, बुटवल पावर र ङादी ग्रुप अग्रस्थानमा थिए। बजार सुरुवातमा केही उकालो लागे पनि त्यसपछि लगातार गिरावट जारी राख्दै अन्तिमसम्म रातो देखिएको छ।
