काठमाडौं, असोज ४ — मलेसियामा सेप्टेम्बर २४ देखि ३० तारिखसम्म हुने मलेसियन सुपर वुमन सिरिज–२०२५ मा नेपाली महिला क्रिकेट टोलीका खेलाडीहरू पनि मैदान उत्रिने भएका छन्। मलेसियन क्रिकेट एशोसिएसनले आयोजना गर्ने यो प्रतियोगिता यसपटक तेस्रो संस्करणका रूपमा हुँदैछ।
यसपटक पाँच टोली — सेन्ट्रल सुपर गर्ल्स, इस्टर्न लायनेस, नर्थन क्वीन्स, साउथर्न जागुअर्स र वेस्टर्न वन्डर वुमन —बीच प्रतिस्पर्धा हुनेछ। अघिल्ला दुई संस्करणमा क्रमशः नर्थन क्वीन्स र वेस्टर्न वन्डर वुमन विजयी बनेका थिए।
नेपालका लागि यो सिरिज महत्वपूर्ण तयारीको अवसर पनि हो, किनकि यसपछि मलेसियाविरुद्धको टी–२० अन्तर्राष्ट्रिय श्रृंखला र आगामी टी–२० विश्वकप ग्लोबल छनोट नजिकिँदैछ।
नेपाली खेलाडीको टोली विभाजन यस प्रकार छ :
- सेन्ट्रल सुपर गर्ल्स : यशोदा बिष्ट, राजमती ऐरि, सिता राना मगर, रिया शर्मा
- इस्टर्न लायनेस : कविता जोशी, सम्झना खड्का
- नर्थन क्वीन्स : रुबी पोद्दार
- साउथर्न जागुअर्स : पूजा महतो, सोमु बिष्ट
- वेस्टर्न वन्डर वुमन : इन्दु वर्मा, सावित्री धामी, रचना चौधरी
त्यसैगरी रुबिना क्षेत्री र कविता कुँवर कुन टोलीबाट खेल्ने भन्ने अन्तिम निर्णय अझै खुलाइएको छैन।
यस सिरिजले नेपाली खेलाडीलाई अन्तर्राष्ट्रिय क्रिकेटमा थप अनुभव दिलाउने अपेक्षा गरिएको छ।
