काठमाडौं, असोज ६ — शिक्षा, विज्ञान तथा प्रविधिमन्त्री महावीर पुनले पदभार ग्रहण गरेसँगै विज्ञान र प्रविधि क्षेत्रको विकासलाई गति दिन चारवटा सल्लाहकार समिति गठन गर्ने निर्णय गरेका छन्। पद तथा गोपनीयताको शपथ ग्रहणपछि उनले केशरमहलस्थित मन्त्रालय पुगेर यो निर्णयलाई औपचारिकता दिएका हुन्।
गठित समितिहरू अन्तरिक्ष प्रविधि, न्यूक्लियर टेक्नोलोजी, बायोटेक्नोलोजी र सूचना प्रविधि तथा कृत्रिम बुद्धिमत्ता (एआई) क्षेत्रसँग सम्बन्धित कार्यमा सल्लाह दिने उद्देश्यले काम गर्नेछन्। मन्त्रालयका अनुसार समितिहरूको विस्तृत कार्यक्षेत्र प्रस्ताव तयार पारिएको छ र सदस्यहरूको नाम टुङ्गो लगाउने प्रक्रिया पछि सम्पन्न गरिनेछ।
यो कदम विज्ञान तथा प्रविधि क्षेत्रमा अनुसन्धान र नवप्रवर्तनलाई प्रवर्द्धन गर्ने र नीति निर्माणमा विशेषज्ञको भूमिका सुनिश्चित गर्ने उद्देश्यले उठाइएको बताइएको छ।
