काठमाडौं, जेठ २३ — नेकपा एकीकृत समाजवादीका अध्यक्ष माधवकुमार नेपालविरुद्ध अख्तियारले दायर गरेको भ्रष्टाचार मुद्दा राजनीतिक वृत्तमा चासोको विषय बनेको छ। यही मुद्दालाई लिएर नेपाली कांग्रेसका सभापति शेरबहादुर देउवाले माओवादी केन्द्रका अध्यक्ष पुष्पकमल दाहाल ‘प्रचण्ड’सँग फोनवार्ता गरेका छन्।
स्रोतका अनुसार बिहीबार साँझ भएको फोन कुराकानीमा देउवाले उक्त मुद्दा कसरी अघि बढ्यो भन्नेबारे प्रचण्डसँग जिज्ञासा राखेका थिए। प्रचण्डले शुक्रबार संसद भवनमा सञ्चारकर्मीहरूसँग कुरा गर्दै देउवाले फोन गरेर सोधपुछ गरेको पुष्टि गरेका छन्।
उनले भने, “देउवाजीले सोध्नुभयो — यो के भयो? अनि म अचम्म परेँ कि उहाँलाई पनि थाहा रहेनछ।”
प्रचण्डले कुरा हँसिलो ढंगले अगाडि बढेको भन्दै दुई नेताबीच केहीबेर ठट्टा पनि भएको उल्लेख गरे। साथै, उनले मुद्दा दर्ता देउवासँग मिलेमतोमा भएको होइन भन्ने कुरा आफूले बुझ्न पुगेको बताए।
