काठमाडौं, असार १ — राष्ट्रपति रामचन्द्र पौडेलले योग्य, नैतिक र जिम्मेवार कर्मचारी छनोट गर्ने कार्यमा लोकसेवा आयोगको भूमिकालाई उल्लेखनीय र प्रशंसनीय रहेको बताएका छन्। आइतबार राजधानीमा आयोजित आयोगको ७५औं वार्षिकोत्सव तथा हीरक जयन्ती समारोहमा प्रमुख अतिथिका रूपमा सम्बोधन गर्दै राष्ट्रपतिले आयोगको सात दशकभन्दा बढी लामो योगदानको सराहना गरे।
राष्ट्रपतिले आयोगलाई अझ सजग र चनाखो भएर प्रेरित, उच्च नैतिकता भएको, अनुशासित र राष्ट्रप्रति सद्भाव राख्ने कर्मचारी छनोट गर्न आग्रह गरे। उनले भने, “सरकारी निकायमा स्थायी सरकारका रूपमा रहने योग्यतम कर्मचारी छनोट गर्ने संवैधानिक जिम्मेवारी पाएको आयोगले आफ्नो मूल सिद्धान्त, स्वच्छता र दक्षतालाई प्रमुख आधार मान्दै निरन्तर काम गर्दै आएको प्रशंसनीय पक्ष हो।”
त्यसैगरी, उनले समावेशी पदपूर्तिको व्यवस्था अनुसार महिला, आदिवासी जनजाति, मधेसी, दलित, अपाङ्गता भएका र पछाडि परेका क्षेत्रका उम्मेदवारलाई सिफारिस गर्न सफल भएको लोकसेवा आयोगको सकारात्मक भूमिका पनि उल्लेख गरे। राष्ट्रपति पौडेलले आयोगले वर्तमान र भविष्यका पुस्ताप्रति न्याय र भरोसाको केन्द्रका रूपमा आफ्नो कर्तव्य पूरा गर्न चनाखो हुनुपर्नेमा जोड दिएका छन्।
