काठमाडौँ, असार २ — चुरे तराई मधेश संरक्षण विकास समितिको स्थापना दिवसको अवसरमा सोमबार देशभर ११औं चुरे संरक्षण दिवस मनाइएको छ। यस अवसरमा नवलपुरको कावासोतीमा आयोजित विशेष कार्यक्रममा राष्ट्रपति रामचन्द्र पौडेलले वृक्षारोपण गर्दै दिवसको औपचारिक शुभारम्भ गरेका हुन्।
चुरे तराई मधेश संरक्षण विकास समिति २०७१ असार २ गते स्थापना भएको हो र यसले चुरे क्षेत्रको प्राकृतिक स्रोत संरक्षण, दिगो व्यवस्थापन र पारिस्थितिकीय सेवाको संवर्धनमार्फत गरिबी न्यूनीकरणमा योगदान पुर्याउँदै आएको छ।
समितिको तथ्यांक अनुसार, अहिलेसम्म २ करोड ९३ लाखभन्दा बढी बिरुवाहरू उत्पादन तथा वितरण गरिएका छन्। नदी किनारमा ४१२ किलोमिटर तटबन्ध निर्माण भइसकेको छ भने १३९ वटा सिमसार क्षेत्र संरक्षणमा परेका छन्। १५ अर्ब रुपैयाँभन्दा बढी बजेट खर्च भइसकेको समितिको अभिलेखमा उल्लेख छ।
देशभरि फैलिएको चुरे क्षेत्र सात प्रदेशका ३७ जिल्ला र ३२५ स्थानीय तहमा फैलिएर रहेका छन्। ललितपुरमा मुख्य कार्यालय राखिएको समितिले चितवन, बुटवल, सलकपुर, जनकपुर, लम्की लगायतका स्थानमा क्षेत्रीय कार्यान्वयन इकाईमार्फत कार्यक्रमहरू संचालन गर्दै आएको छ।
