असार २३, काठमाडौं — राष्ट्रपति रामचन्द्र पौडेलले नेपाली क्रिकेट टोलीले पछिल्लो समयमा देखाएको उत्कृष्ट प्रदर्शनको प्रशंसा गर्दै, यसको मूल कारण खेलाडीहरूको निष्ठा, लगाव र कठिन मेहनत भएको बताएका छन्।
शीतल निवासमा एसीसी यू-१६ इस्ट जोन कप क्रिकेट प्रतियोगिताका विजेता नेपाली टोलीलाई सम्मान गर्दै राष्ट्रपति पौडेलले सिंगापुरसँगको फाइनल जितमार्फत नेपाली टोलीले मुलुकको इज्जत र गौरव थप उचो बनाएको धारणा राखे। उनले युवा खेलाडीहरूले अन्तर्राष्ट्रिय स्तरमा देखाएको क्षमताले सम्पूर्ण देशवासीलाई गर्व महसुस गराएको बताए।
राष्ट्रपतिले परम्परागत खेलहरूको संरक्षण र प्रवर्द्धनसँगै अन्तर्राष्ट्रिय प्रतियोगितामा नेपालको प्रभावशाली सहभागिता सुनिश्चित गर्न पूर्वाधार विकास र व्यवस्थित तालिमको आवश्यकता औँल्याए। देशभित्रै खेलकुदको वातावरण सुदृढ गर्दै प्रतिस्पर्धात्मक खेलाडी उत्पादनमा सबै पक्ष जिम्मेवार हुनुपर्ने उनको भनाइ थियो।
उनका अनुसार खेलकुदले मुलुकको अन्तर्राष्ट्रिय छवि निर्माणमा ठूलो भूमिका खेल्ने भएकाले राज्य र समाज दुवैको समन्वयबाट खेल क्षेत्रलाई थप सशक्त बनाउनु जरुरी छ।
