काठमाडौं, १ असार — भिजिट भिसा दुरुपयोग प्रकरणको सन्दर्भमा गृहमन्त्री रमेश लेखकको राजीनामाको माग गर्दै आएको राष्ट्रिय स्वतन्त्र पार्टी (रास्वपा) ले प्रतिनिधि सभामा आफ्नो विरोध कायमै रहने स्पष्ट पारेको छ।
रास्वपाका प्रमुख सचेतक सन्तोष परियारले माओवादी केन्द्रले एमालेसँग दुई बुँदे सहमति गरेर संसद अवरोध खोल्ने निर्णय लिँदा आफूहरूलाई छल गरिएको दाबी गरे। उनले भने, “हामीले उठाएको मुद्दा निष्कर्षमा नपुगेसम्म हाम्रो विरोध जारी रहनेछ।”
सभामुख देवराज घिमिरेले सदनको सहज सञ्चालनको लागि रास्वपाका नेताहरूसँग छलफल गरेका थिए। तर रास्वपाले माग सुनुवाइ नभएसम्म आफ्नो अवरोध नहटाउने अडान लिएको हो। यसै कारण आजको संसद बैठक समयमै सुरु हुन सकेन।
सभामुख घिमिरेले आज बिहान रास्वपाका कार्यवाहक अध्यक्ष डा. डीपी अर्याल र राप्रपाका अध्यक्ष राजेन्द्र लिङ्देनसँग छुट्टाछुट्टै भेट गर्दै बजेट सत्र अवरुद्ध नगर्न अनुरोध गरेका थिए। उनले संवैधानिक दायित्वअनुसार बजेट माथिको छलफल अनिवार्य रहेको बताएका छन्।
यस अवरोधका बीचमा संसदको नियमित कार्यसूची प्रभावित भइरहेको छ भने सत्तापक्ष र प्रतिपक्षबीच राजनीतिक सहमतिका प्रयास पनि जारी छन्।
