काठमाडौं, २५ असार — अमेरिकी राष्ट्रपति डोनाल्ड ट्रम्पले युक्रेनमा जारी युद्धको प्रतिक्रिया स्वरूप रूसमाथि थप प्रतिबन्ध लगाउने सम्भावना रहेको बताएका छन्। ह्वाइट हाउसमा भएको मन्त्रीपरिषद्को बैठकमा उनले अमेरिकी सिनेटमा प्रस्तावित प्रतिबन्ध विधेयकलाई समर्थन गर्ने वा नगर्ने विषयमा विचार गरिरहेको बताए।
उक्त विधेयकमा रूसबाट ऊर्जा आयात गर्ने देशहरूमा भारी शुल्क लगाउने र रूसी ऊर्जा उत्पादनमा सहयोग गर्ने विदेशी कम्पनीहरूमा प्रतिबन्ध लगाउने प्रावधान समावेश छ।
यसैबीच, अमेरिकी रक्षा विभागले युक्रेनका लागि अस्थायी रूपमा रोकिएको रक्षात्मक हतियार ढुवानी पुनः सुरु गर्ने स्वीकृति दिएको ट्रम्पले मङ्गलबार घोषणा गरेका थिए। यो निर्णयले युक्रेनलाई रुसको आक्रमणविरुद्ध थप सुरक्षा प्रदान गर्ने अपेक्षा गरिएको छ।
ट्रम्पले रुसी राष्ट्रपति भ्लादिमिर पुटिनसँगको द्वन्द्वमा असन्तुष्टि व्यक्त गर्दै युद्ध विरामका लागि दुवै पक्षलाई वार्तामा आउन दबाब दिइरहेका छन्। अमेरिकी प्रशासनले रूसमाथि आर्थिक दबाब बढाउन प्रतिबन्धहरू कडा पार्ने तयारीमा रहेको देखिन्छ।
