काठमाडौं, भदौ २६ — नेपाल प्रहरीले हालैका प्रदर्शनका क्रममा लुटिएका आफ्ना सामग्री फिर्ता गर्न आम जनतालाई आग्रह गरेको छ। प्रहरीका अनुसार भदौ २४ र २५ गते भएको हिंसात्मक आन्दोलनमा सुरक्षा हातहतियार, सञ्चार साधन, सवारीसाधन, असबाब र अन्य भौतिक साधनहरू लुटिएका थिए।
प्रहरीले फेला परेको वा नियन्त्रणमा ल्याइएका सामाग्रीहरू नजिकको प्रहरी कार्यालय, जिल्ला प्रहरी कार्यालय, प्रहरी कन्ट्रोल १०० वा टोल-फ्री नम्बर १६६००१४१५१६ मार्फत फिर्ता बुझाउन अनुरोध गरेको छ।
साथै, प्रहरीले प्रदर्शनकारीहरूले नियन्त्रणमा लिएको प्रहरी पोशाक दुरुपयोग नगर्न चेतावनी दिएको छ। यसबारे जानकारी भएको व्यक्तिहरूलाई पनि उपलब्ध गराउन आग्रह गरिएको छ। सुरक्षा सामग्री र पोशाक फिर्ता नगरेको अवस्थामा कानुनी कारबाही गर्न सकिने चेतावनी प्रहरीले दिएको छ।
