काठमाडौं, १७ असार — श्रम, रोजगार तथा सामाजिक सुरक्षामन्त्री शरतसिंह भण्डारीले वैदेशिक रोजगारीबाट फर्किएका नेपालीहरूको सीप, ज्ञान र पूँजीलाई देशमै उद्यमशीलतामा रूपान्तरण गर्न आवश्यक रहेको बताएका छन्।
मंगलबार मन्त्रालयमा आयोजित कार्यक्रममा उनले सरकार अब विदेशमा काम गरेर फर्किएकालाई सहजीकरण मात्रै होइन, उनीहरूलाई उद्यमी बन्ने बाटोमा अग्रसर गराउने रणनीतिमा लागेको स्पष्ट पारे। त्यसका लागि नयाँ नीति पनि तयार पारिएको उनले जानकारी दिए।
मन्त्री भण्डारीका अनुसार, सरकारले आगामी दशकलाई ‘आन्तरिक रोजगार प्रवर्द्धन दशक’को रूपमा लिने निर्णय गरिसकेको छ र सोहीअनुसार श्रम मन्त्रालयभित्र आन्तरिक रोजगार महाशाखा स्थापना गरिएको छ। यो महाशाखाले आवश्यक सीप विकास, जनशक्ति उत्पादन तथा निजी क्षेत्रसँगको सहकार्यमार्फत रोजगार सिर्जनामा सहयोग पुर्याउने बताइएको छ।
उनले तालिमका लागि राष्ट्रिय व्यवसायिक प्रतिष्ठानमार्फत विभिन्न संघ–संस्थासँग सहकार्य भइरहेको जनाउँदै हालसम्म होटल एसोसिएसन नेपाल, कम्प्युटर एसोसिएसन नेपालसहित १३ संस्थासँग सहमति भइसकेको जानकारी दिए।
कार्यक्रमका अवसरमा वैदेशिक रोजगारीबाट फर्केर स्वदेशमै उद्यम स्थापना गरेका आठ जना नेपाली उद्यमीहरूलाई ‘राष्ट्रिय उद्यमी पुरस्कार’ प्रदान गरिएको थियो।
