काठमाडौं, भदौ ७ — झापाको कनकाई नगरपालिकामा करेन्ट लागेर एक युवकको ज्यान गएको छ। शनिबार बिहान करिब ८:३० बजे माछा मार्ने क्रममा बिजुलीको तारमा करेन्ट लगाउँदा दुर्घटना भएको हो।
स्थानीय ३७ वर्षीय पंकज माझीले खहरे खोलामा माछा मार्न विद्युत् प्रयोग गर्ने क्रममा करेन्टले छोएपछि घटनास्थलमै मृत्यु भएको प्रहरीले जनाएको छ।
घटनापछि इलाका प्रहरी कार्यालय अनारमनीको टोली अनुसन्धानका लागि घटनास्थल पुगेको छ। प्रमुख प्रहरी नायब उपरीक्षक विजय श्रेष्ठका अनुसार आवश्यक कानुनी प्रक्रिया अघि बढाइएको छ।
विद्युत् प्रयोग गरेर माछा मार्ने कार्य जोखिमपूर्ण मात्र नभई गैरकानुनी समेत भएकाले यसले ज्यानै गुमाउने अवस्था आएको भन्दै प्रहरीले सर्वसाधारणलाई सचेत रहन आग्रह गरेको छ।
