काठमाडौं, साउन १२ — पर्सा जिल्लाको वीरगञ्ज महानगरपालिका तथा आसपासका क्षेत्रमा गम्भीर खानेपानी अभाव देखिएपछि नेपाली सेनाको श्रीजङ्ग गणले पानी वितरणको जिम्मा लिएको छ। मधेस प्रदेश सरकारको सहयोगमा सेनाले दैनिक औसतमा एक लाख लिटर पानी ट्याङ्करमार्फत वितरण गर्दै आएको छ, जसले स्थानीय बासिन्दालाई ठूलो राहत दिएको छ।
श्रीजङ्ग गणका प्रमुख सेनानी लोकेन्द्र कार्कीका अनुसार पानीको चरम अभाव झेलिरहेका बस्तीहरूमा बिहान ७ बजे, दिउँसो २ बजे र साँझ ६ बजे गरी दिनको तीनपटक ट्याङ्करमार्फत पानी वितरण हुँदै छ। वीरगञ्ज महानगरका विभिन्न वडाहरू जस्तै छपकैया, गायत्री टोल, श्रीपुर, राधेमाई, बहुअरीचोक, भिष्वा, रामगढवा, सुगौली विर्ता, हुसनजहान चोक लगायत नियमित वितरणको तालिकामा परेका छन्।
त्यस्तै, पर्साको बहुदरमाई नगरपालिका–१ विश्रामपुर र दक्षिणटोल क्षेत्रमा पनि बिहान १० बजे र दिउँसो ४ बजे गरी दुईपटक पानी वितरण भईरहेको छ।
यस कार्यमा मधेस प्रदेश सरकार, जिल्ला प्रशासन कार्यालय, जिल्ला विपद् व्यवस्थापन समिति, स्थानीय तह र खानेपानी संस्थान वीरगञ्ज शाखा कार्यालयबीच सहकार्य भइरहेको छ।
पर्साका प्रमुख जिल्ला अधिकारी गणेश अर्यालले पानी अभाव झेलिरहेका नागरिकहरूबाट लगातार उजुरी आइरहेकाले, आवश्यकतालाई मध्यनजर गर्दै ट्याङ्करबाट वितरण कार्य जारी राखिएको बताएका छन्।
साउन १ गतेदेखि सुरु भएको यो सेवा अझै केही समय जारी रहनेछ, जबसम्म संकट पूर्णरूपमा समाधान हुँदैन। नेपाली सेनाको सक्रियता र सरकारको समन्वयले वीरगञ्जवासीलाई अहिलेको विषम परिस्थितिमा ठूलो राहत दिएको छ।
