काठमाडौं, भदौ १० — वीरगञ्ज क्षेत्रमा हैजा फैलिएको आशंका पुष्टि हुँदै गएको छ। राष्ट्रिय जनस्वास्थ्य प्रयोगशालाले हालसम्म परीक्षण गरिएको १० नमुनामध्ये ८ मा हैजा संक्रमण देखिएको जानकारी दिएको छ। बाँकी दुई नमुनाको नतिजा भने भोलिसम्म सार्वजनिक हुने जनाइएको छ।
प्रयोगशालाका प्रमुख डा. रञ्जन भट्टका अनुसार सब–कल्चर प्रक्रियाबाट पत्ता लागेको संक्रमणले हैजा समुदायमै फैलन थालेको संकेत गरेको छ। उनका अनुसार, विभिन्न अस्पतालमा भर्ना भएका बिरामीहरूको नमुना परीक्षणका क्रममा यो अवस्था देखिएको हो।
८० प्रतिशतभन्दा बढीमा रोग पुष्टि हुनुले जोखिम अझ गम्भीर बनेको विज्ञहरूले बताएका छन्। स्वास्थ्यकर्मीहरूले सरसफाइमा विशेष ध्यान दिन, सुरक्षित खानेपानी प्रयोग गर्न तथा लक्षण देखिएमा तत्काल उपचार लिन सर्वसाधारणलाई आग्रह गरेका छन्।
