काठमाडौं, २७ असार — नेपाली टेलिभिजनमा प्रसारण भइरहेको लोकप्रिय व्यवसायिक रियालिटी शो ‘शार्क ट्यांक नेपाल’ले यस साता एक ऐतिहासिक डिल सम्पन्न गरेको छ। शैक्षिक क्षेत्रलाई डिजिटल रूपान्तरण गर्ने उद्देश्यले विकसित गरिएको ‘वेद’ एपले शार्क हेमराज ढकालबाट ६ करोड रुपैयाँको लगानी प्राप्त गर्दै शोको अहिलेसम्मकै सबैभन्दा ठूलो डिल सुरक्षित गरेको हो।
‘वेद’ एप स्कुल व्यवस्थापन प्रणालीमा केन्द्रित स्टार्टअप हो, जसले विद्यार्थी, शिक्षक, अभिभावक र विद्यालय प्रशासनलाई एउटै डिजिटल प्लेटफर्ममा जोड्न लक्ष्य राखेको छ। शोमा सहसंस्थापक निर्देश द्वाले एपको सम्भावना र प्रभावशाली मोडल प्रस्तुत गरेपछि शार्क ढकाल उक्त आइडियाबाट प्रभावित बने। अन्य केही शार्कहरूले भने परियोजनामा जोखिम देख्दै लगानी गर्न इन्कार गरेका थिए।
ढकालले एपमा २० प्रतिशत इक्विटी र केपीआई (प्रदर्शन सूचकांक) सर्तसहित ६ करोड लगानी गर्ने निर्णय गरे। यो डिलले नेपाली स्टार्टअप क्षेत्रको आत्मविश्वास बढाएको छ र शिक्षा क्षेत्रमा प्रविधिको प्रयोगलाई थप गति दिने विश्वास गरिएको छ।
यस्तै, शोका तेस्रो र चौंथो एपिसोडमा थप तीन स्टार्टअपले पनि विभिन्न शार्कहरूबाट संयुक्त रूपमा लगानी प्राप्त गरेका छन्। यस साता मात्रै शोमार्फत ७ करोड ४० लाख रुपैयाँ बराबरको लगानी सहमति भएको छ, जुन अघिल्लो साताको ५ करोड ७२ लाखभन्दा बढी हो। ‘शार्क ट्यांक नेपाल’ क्रमशः नेपाली उद्यमशीलता प्रवर्द्धनको प्लेटफर्मको रूपमा स्थापित हुँदै गएको देखिन्छ।
