काठमाडौं, भदौ १६ — निजी विद्यालय सञ्चालकहरूले शिक्षा विधेयकप्रति असन्तुष्टि जनाउँदै आइतबार राजधानीको चक्रपथ क्षेत्रमा स्कुल बससहित प्रदर्शन गरेका छन् ।
पूर्ण छात्रवृत्ति र विद्यालयलाई गैरनाफामूलक बनाउनुपर्ने प्रावधान हटाउनुपर्ने माग राख्दै विद्यालय सञ्चालक संगठनहरूले र्याली आयोजना गरेका हुन्। हालै संसदको शिक्षा, स्वास्थ्य तथा सूचना प्रविधि समितिबाट विधेयक पारित भएपछि उनीहरूले दबाबमूलक कार्यक्रम थालेका हुन्।
प्याब्सन, नेशनल प्याब्सन, हिसान, अपेन र एनएमएजस्ता संघ–संस्थाले संयुक्त पहलमा र्याली निकालेका थिए। र्यालीका क्रममा पहेँला रंगका स्कुल बस चक्रपथको एकतर्फी लेनमा लामबद्ध भएका थिए।
सञ्चालकहरूको प्रदर्शनका कारण चक्रपथका केही भागमा यातायात अवरुद्ध भई साधारण यात्रुहरूलाई सास्ती परेको थियो।
