काठमाडौं, असोज ३ — नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ ले ठूला भनिएका दलहरूको अहंकारले देशलाई गम्भीर संकटतर्फ धकेलेको टिप्पणी गरेका छन्। संविधान दिवसको अवसरमा पार्टी कार्यालय पेरिसडाँडामा आयोजित कार्यक्रममा बोल्दै उनले संघीय लोकतान्त्रिक गणतन्त्रको संविधान निर्माणको क्रममा अनिच्छुक रहेका दलहरूको व्यवहारले आजको अवस्था सिर्जना गरेको बताए।
उनका अनुसार माओवादीले प्रत्यक्ष निर्वाचित कार्यकारी राष्ट्रपति वा पूर्ण समानुपातिक निर्वाचन प्रणालीको पक्षमा निरन्तर आवाज उठाउँदै आएको छ, र हालैको जेनजी आन्दोलनले पनि त्यही आवश्यकता पुनः पुष्टि गरेको छ। संविधानलाई आवश्यक परे पुनर्लेखन वा संशोधनमार्फत जनताको अपेक्षा अनुसार सुधार गर्न सकिने उनले स्पष्ट पारे।
प्रचण्डले उत्पीडित वर्ग र समुदायका अधिकार सुनिश्चित गर्न माओवादीले ऐतिहासिक भूमिका खेलेकोमा गर्व गर्नुपर्ने धारणा व्यक्त गरे। उनले सुशासन, संविधानसभा र भ्रष्टाचारविरोधी अभियानमा माओवादीको भूमिकालाई प्रश्न उठाउनु जनतालाई धोका दिने बराबर भएको बताए।
जेनजी आन्दोलनका क्रममा घुसपैठ र योजनाबद्ध विध्वंस भएको आरोप लगाउँदै उनले राष्ट्रपति र प्रधानसेनापतिको भूमिकालाई भने सकारात्मक रूपमा उल्लेख गरे। आगामी निर्वाचन तोकिएको मितिमा सम्पन्न भई प्रत्यक्ष निर्वाचित कार्यकारी राष्ट्रपति व्यवस्था संवैधानिक तरिकाले लागू होस् भन्ने चाहना माओवादीको रहेको प्रचण्डले जोड दिए।
