संघीय संसद् सचिवालयको रिक्त सचिवालय सचिव पदमा सुरजकुमार दुरालाई बढुवा गरिएको छ। सभामुख देवराज घिमिरेको अध्यक्षतामा बसेको सचिवालय सञ्चालन तथा व्यवस्थापन समितिको बैठकले दुरालाई सचिवालय सचिवमा बढुवा गर्ने निर्णय गरेको हो।
लोकसेवा आयोगको अध्यक्षतामा रहेको बढुवा समितिले केही दिनअघि दुरासहित मनोजकुमार गिरी र हृदयराम महर्जनलाई बढुवा गर्न सिफारिस गरेको थियो। यसअघि सचिवालय सचिव सुदर्शन खड्काले राजीनामा दिएपछि उक्त पद रिक्त भएको थियो।
धनगढी उपमहानगरपालिका-१, शान्तिनगरका दुरा २०४६ सालमा निजामती सेवामा प्रवेश गरेका थिए र २०५२ सालदेखि संघीय संसद् सचिवालयमा निरन्तर सेवा दिँदै आएका छन्। उनले प्रशासन महाशाखा तथा संसदीय समितिहरूमा विभिन्न जिम्मेवारी सम्हालेका छन्।
संसद् सचिवालयमा उनले प्रशासन महाशाखा र संसदीय समितिको सचिवलगायत महत्वपूर्ण जिम्मेवारीहरू सम्हालेका छन् र हाल राज्यव्यवस्था तथा सुशासन समितिको सचिवको रूपमा कार्यरत थिए। दुराले शनिबार सिंहदरवारस्थित कार्यालयमा पदबहाली गरेका छन्।
सभामुख देवराज घिमिरे, राष्ट्रिय सभा अध्यक्ष नारायणप्रसाद दाहाल लगायतका पदाधिकारीहरूले उनलाई बधाई र सफल कार्यकालको शुभकामना दिएका छन्।
