१४ साउन, काठमाडौं — बुधबार राष्ट्रिय सभाको एक महत्वपूर्ण बैठक चलिरहेको बेला प्रधानमन्त्री केपी शर्मा ओली सक्रिय रुपमा बहस सुन्दै थिए, तर मन्त्रीहरूको अवस्था भने फरक देखियो। सत्तापक्षको पहिलो लहरमा प्रधानमन्त्रीसँगै बसेका केही मन्त्रीहरू बैठककै दौरान निदाएको देखियो।
बैठकमा सांसदहरू अल्पविकसित राष्ट्रबाट स्तरोन्नति (एलडीसी ग्रयाजुएसन) पछि देशले सामना गर्ने अवसर र चुनौतीबारे बहस गर्दै थिए। प्रधानमन्त्री ओलीले बहसलाई गम्भीरतापूर्वक सुनेको भन्दै संसदमा भाग लिने सांसदहरूको खुलेर प्रशंसा गरे। उनले यस्तो बहसले संसदको गरिमा बढाएको समेत उल्लेख गरे।
तर, प्रधानमन्त्रीकै छेउछाउमा बसेका केही मन्त्रीहरू बहसको क्रममा निदाइरहेका थिए। उपप्रधान तथा अर्थमन्त्री विष्णु पौडेल, युवा तथा खेलकुदमन्त्री तेजुलाल चौधरी र रक्षामन्त्री मानवीर राई बैठकको क्रममा निदाएको दृश्य सामाजिक सञ्जालमा भाइरल बनेको छ।
नागरिकहरूले मन्त्रीहरूको यस्तो लापरबाहीपूर्ण व्यवहारप्रति सामाजिक सञ्जालमा आलोचना गरेका छन्। संसद जस्तो गरिमामय स्थानमा यस्तो व्यवहारले जनप्रतिनिधिको जिम्मेवारीमाथि प्रश्न उठाएको देखिन्छ।
