साउन २, काठमाडौं — सगरमाथा आरोहण मार्गमा बढ्दो जोखिमका बीच संस्कृति, पर्यटन तथा नागरिक उड्डयन मन्त्री बद्री प्रसाद पाण्डेले वैकल्पिक र सुरक्षित मार्ग अन्वेषण तथा अध्ययन गर्न जोड दिएका छन्।
मन्त्रालयमा आयोजित छलफलमा, हालको खुम्बु आइसफेल हुँदै क्याम्प–१ सम्मको परम्परागत आरोहण मार्ग जोखिमपूर्ण भएको उल्लेख गर्दै यसको विकल्प आवश्यक भएको नतिजा प्रस्तुत भएको छ।
मन्त्री पाण्डेका अनुसार, सगरमाथा राष्ट्रिय गौरवको प्रतीक हो र प्रत्येक वर्ष यहाँ धेरै आरोहीहरू आउने भएकाले उनीहरूको सुरक्षाका लागि वातावरणमैत्री र दीर्घकालीन समाधान खोज्नुपर्ने महत्वपूर्ण छ। उनले भने, “हामीले जोखिम घटाउने मात्र होइन, सम्पूर्ण आरोहण प्रक्रियालाई व्यवस्थित र विश्वसनीय बनाउने दिशामा काम गर्नुपर्छ।”
बैठकमा फ्रेन्च पर्वतारोही मार्क मारी बटार्ट र नेपाली आरोही स्पिड काजी शेर्पाले विगत वर्षहरूमा गरिएको वैकल्पिक मार्ग खोजी, सर्वेक्षण र फोटोग्राफिक तथ्यांकको विस्तृत जानकारी प्रस्तुत गरे। उनीहरू सन् २०१८ देखि नयाँ मार्ग पहिचानमा सक्रिय छन् र २०८१ सालमा नेपाल सरकारको समन्वयमा परीक्षण आरोहणमार्फत नयाँ सम्भावनाहरूबारे अध्ययन पनि गर्दै आएका छन्।
यस प्रयासले सगरमाथा आरोहणमा आउने जोखिम घटाउन र आरोहीहरूको सुरक्षा र अनुभवलाई सुधार्न मद्दत पुर्याउने अपेक्षा गरिएको छ।
