काठमाडौं, ४ असोज – भौतिक पूर्वाधार तथा यातायात मन्त्रालयले देशभर अवरुद्ध भएका मुख्य सडकहरू विशेष परिस्थिति बाहेक ६ घण्टाभित्र खुल्ने लक्ष्य राखेर काम अघि बढाएको जनाएको छ। मन्त्रालयका सचिव केशवकुमार शर्माले शनिबार आयोजित बैठकमा सडक विभाग र मन्त्रालयको टोली सक्रिय रहेको जानकारी दिएका छन्।
भौतिक पूर्वाधार तथा यातायातमन्त्री कुलमान घिसिङको अध्यक्षतामा भएको बैठकमा सचिव शर्माले चाडपर्वको समयमा यातायात सहज बनाउन विशेष योजना अनुसार सडक विभागले काम गरिरहेको बताए। उनले रातिदेखि अवरुद्ध रहेका पृथ्वी राजमार्ग र मुग्लिङ खण्डको तुइन खोलामा पनि काम सुरु भइसकेको र चार घण्टाभित्र सडक खुल्ने दाबी गरे।
सडक सफा गर्ने क्रममा पहिरो सक्रिय रहेको स्थानमा तत्काल काम गर्न नसकिने भए पनि सडक विभागले मेसिन र कर्मचारीहरू घटनास्थलमा पठाइसकेको छ। आधा घण्टादेखि एक घण्टाभित्र मेसिनहरूले काम शुरू गर्ने तयारी रहेको सचिव शर्माले बताए।
बैठकमा मन्त्री घिसिङले समस्या छिटो समाधान गर्न फास्ट ट्रयाक प्रक्रिया अपनाउने योजना प्रस्तुत गरे। सहभागी यातायात व्यवसायीहरूले रातको बसलाई दिउँसो चलाउने विकल्प सुझाए, जसले यात्रुहरूको सुविधा सुनिश्चित गर्नेछ।
