काठमाडौं, भदौ ५ – प्रमुख प्रतिपक्षी नेकपा माओवादी केन्द्रले लिपुलेक नाकालाई व्यापारका लागि प्रयोग गर्ने भारत–चीनबीचको सहमति विषयमा सरकारको धारणा सदनमा प्रस्तुत गर्न आग्रह गरेको छ।
बिहीबार प्रतिनिधिसभाको आकस्मिक समयमा माओवादी केन्द्रका प्रमुख सचेतक हितराज पाण्डेले यस विषयमा सरकारले सदनमा स्पष्ट जानकारी दिनुपर्ने माग राखेका छन्। उनले भने, “जनताको प्रतिनिधिका रूपमा यस सभालाई आवश्यक विवरण उपलब्ध गराउन नेपाल सरकारलाई सम्माननीय सभामुखमार्फत अनुरोध गर्दछौँ।”
पाण्डेले नेपालको सार्वभौमिकता र अखण्डताको रक्षा गर्न राष्ट्रिय एकतामा सबल भई अघि बढ्नुपर्नेमा जोड दिए। “हाम्रा दुई छिमेकी मित्र राष्ट्रहरूले हाम्रो देशलाई जानकारी नै नदिई लिपुलेक पासमार्फत द्विपक्षीय व्यापार खोल्ने सहमति गरेको खबरले हाम्रो ध्यानाकर्षण भएको छ,” उनले थपे।
उनले कूटनीतिक तवरबाट वार्ता अघि बढाउने र नेपालको हित सुनिश्चित गर्ने उपायहरू खोज्न सरकारलाई सुझावसमेत दिएका छन्।
