काठमाडौं, २७ भदौ । हाल सिंहदरबारमा भएको भीषण आक्रमणपछि आगामी प्रधानमन्त्रीलाई कहाँ राख्ने भन्नेबारे प्रशासनले वैकल्पिक व्यवस्था खोजिरहेको छ। यस क्रममा गृह मन्त्रालयको निर्माणाधीन नयाँ भवनलाई सम्भावित विकल्पको रूपमा अध्ययन गरिएको छ।
मुख्यसचिव एकनारायण अर्यालसहित सचिवहरूको टोलीले विभिन्न भवनहरूको अवस्थाबारे निरीक्षण गर्दा अन्य संरचनाहरू उपयुक्त नभएकाले नयाँ गृह मन्त्रालय भवनलाई प्राथमिकतामा राखिएको एक सचिवले जानकारी दिए।
बुधबारको आक्रमणमा सिंहदरबारभित्रका अधिकांश कार्यालयहरू क्षतिग्रस्त भएका छन्। कागजातहरू जलेका छन्, सवारीसाधनमा क्षति पुगेको छ र मन्त्रालयका भवनहरू प्रयोगयोग्य नरहेको अवस्था बनेको छ।
मुख्यसचिव अर्यालले प्रधानमन्त्री र मन्त्रीहरूको कार्यालय व्यवस्थापन कसरी गर्ने भन्ने विषयमा अध्ययन भइरहेको र प्रशासनिक काम सिंहदरबारकै परिधिभित्रबाट सञ्चालन गर्ने योजना रहेको बताएका छन्।
