काठमाडौं, भदौ ३ — स्वास्थ्यकर्मीका लागि सुरक्षित कार्यस्थल संघर्ष समितिले निजी मेडिकल कलेजमा एमबीबीएस र बिडिएस कार्यक्रमका सिट संख्या बढाउने चिकित्सा शिक्षा आयोगको निर्णयलाई कडा रुपमा अस्वीकृत गर्दै तत्काल खारेज गर्न माग गरेको छ।
समितिले यस्तो निर्णयले शिक्षा गुणस्तरमा गिरावट आउने र दक्षताविहीन चिकित्सकहरूको उत्पादन बढ्ने खतरा रहेको चेतावनी दिएको छ।
समितिले मेडिकल कलेजहरूको क्षमता १०० सिटभन्दा बढी नभएको स्पष्ट रिपोर्टहरू हुँदाहुँदै पनि आयोगले १०० भन्दा बढी सिट दिने निर्णय गरेकाले त्यसले निजी कलेजहरूको मात्र आर्थिक स्वार्थ बढाउने आरोप लगाएको छ। यसले विद्यार्थीमाथि अतिरिक्त आर्थिक बोझ पर्ने र देशको जनस्वास्थ्यमा नकारात्मक प्रभाव पर्ने समितिको भनाइ छ।
समितिले यस किसिमको अव्यवस्थित निर्णयलाई तत्काल सच्याइने र आवश्यक परे सडक आन्दोलनमा समेत जाने चेतावनी दिएको छ। साथै, मेडिकल शिक्षा सुधारका लागि दीर्घकालीन योजना र राष्ट्रिय हितलाई ध्यानमा राखेर मात्र नीति बनाउन सरकार र सम्बन्धित निकायलाई जोरदार आग्रह गरेको छ।
