काठमाडौं, साउन १२ — सिन्धुली जिल्लाको गोलन्जोर गाउँपालिका–६ मा अवस्थित भण्डास बिप्पर कटेरी भन्ने स्थानबाट एकै परिवारका १६ जना अचानक हराएको घटनाले स्थानीय समुदायमा सनसनी फैलिएको छ।
सोमबार बिहानदेखि सम्पर्कविहीन बनेका उर्मिला हायुको परिवारबारे गाउँलेहरूले जिल्ला प्रहरी कार्यालयमा जानकारी दिएपछि प्रहरी सक्रिय भएको हो।
जिल्ला प्रहरी कार्यालय, सिन्धुलीका प्रहरी प्रमुख एसपी लालध्वज सुवेदीका अनुसार सूचना प्राप्त भएपछि प्रहरी टोली तुरुन्तै घटनास्थलमा पुगेर प्रारम्भिक अनुसन्धान सुरु गरेको छ। उनले बताएअनुसार हायुको घरमा सामान्य क्षति देखिएको छ भने घरपालुवा जनावरहरू; कुखुरा, बाख्रा, र भैंसीहरू अलपत्र अवस्थामा फेला परेका छन्। तर घरमा कोही पनि मानिस भेटिएनन्।
स्थानीय जनप्रतिनिधि र गाउँलेहरू पनि घटनाप्रति चिन्तित छन्। उनीहरूका अनुसार हायु परिवारका सदस्यहरू कुनै पनि किसिमको पूर्वसूचना वा तयारीबिनै एकाएक हराएको अवस्थामा देखिएका हुन्, जसले घटनालाई अझ रहस्यमय बनाएको छ।
हाल प्रहरी बेपत्ता परिवारको अवस्था र सम्भावित कारण पत्ता लगाउन गाउँमा अनुसन्धान तीव्र बनाउँदैछ। हराएको परिवारको अवस्था अज्ञात रहेकाले सुरक्षा र उद्धार पक्षलाई लिएर व्यापक चासो उत्पन्न भएको छ।
