काठमाडौं, भदौ २६ — अनेरास्ववियुका अध्यक्ष सुजन कडरियाले आफ्नो राजीनामा फिर्ता लिएका छन्। उनले आन्दोलनका क्रममा विद्यार्थीमाथि भएको गोली प्रहार र आफ्नै घरमा हातहतियारसहित आक्रमण गरिने घटनाले आफूलाई दबाबमा राखेको उल्लेख गर्दै, सामाजिक सञ्जालमार्फत दिइएको राजीनामा अनावश्यक दबाबकै कारण भएको प्रष्ट पारेका छन्।
कडरियाले भने, “मैले कुनै पनि संगठनबाट आधिकारिक रूपमा राजीनामा दिएको छैन।”
उनले घटनाक्रमका क्रममा आफूमाथि शारीरिक हमला र हत्या प्रयास भएको दाबी गर्दै देश अहिले गम्भीर परिस्थितिमा रहेको बताएका छन्। त्यसैले अहिले आपसी दोषारोपणभन्दा एकताको आवश्यकता भएको उनले औंल्याएका छन्। कडरियाले सबै पक्षलाई संयमित भएर देशको स्थितिलाई सामान्य बनाउन सहकार्य गर्न आह्वान समेत गरेका छन्।
