काठमाडौं, भदौ ३ – नेपाली बजारमा मंगलबार सुनको मूल्यमा उल्लेखनीय गिरावट आएको छ। नेपाल सुनचाँदी व्यवसायी महासंघका अनुसार प्रतितोला सुनको भाउ १ हजार २ सय रुपैयाँले घटेर १ लाख ९५ हजार १ सय रुपैयाँमा पुगेको हो। अघिल्लो दिन यो मूल्य १ लाख ९६ हजार ३ सय रुपैयाँ थियो।
यसअघि साउन २३ गते सुनको मूल्य १ लाख ९९ हजार ४ सय रुपैयाँ पुगेको थियो, जुन हालसम्मकै उच्च दर मानिन्छ। तर त्यसयता लगातार मूल्यमा गिरावट हुँदै आएको छ।
यस्तै, चाँदीको भाउ पनि घटेको छ। अघिल्लो दिन प्रतितोला २३१५ रुपैयाँ रहेको चाँदी मंगलबार १५ रुपैयाँले घटेर २३०० रुपैयाँमा कारोबार भएको छ। केही दिनअघि चाँदीको मूल्य २३५० रुपैयाँसम्म पुगेको रेकर्ड रहेको थियो।
सुन–चाँदी दुवैको मूल्यमा देखिएको यो गिरावट अन्तर्राष्ट्रिय बजार मूल्य र आयात–निर्यात प्रभावसँग सम्बन्धित रहेको व्यवसायीहरूले बताएका छन्।
