काठमाडौं, भदौ २० — यस साता नेपाली सेयर बजार फेरि ओरालो लाग्दै दुई महिनाकै न्यून स्तरमा पुगेको छ। नेप्से ६२ अंक (२.२२ प्रतिशत) घटेर २७१९ अंकमा झरेको छ, जुन साउन १३ गतेको ३००२ अंकपछि लगातार घट्दै आएको हो।
सप्ताहभर कारोबारमा उतारचढाव रह्यो—आइतबार बजार ३१ अंकले घट्दा सोमबार भने १२ अंकले बढ्यो। तर त्यसपछिका तीन दिन लगातार नेप्सेमा गिरावट आएको छ। कारोबार रकम पनि घट्दो क्रममा देखिएको छ, जसले लगानीकर्तामा थप अनिश्चितता बढाएको छ।
यस साता सबै उपसमूहका सूचक हरियो नभई राताम्य भए। ‘फियर एण्ड ग्रिड इन्डेक्स’ समेत एक्स्ट्रिम फियर जोनमा पुगेको छ, जसले लगानीकर्ताको मनोविज्ञानलाई प्रष्ट संकेत गर्छ। कतिपयले घाटा बढेपछि सेयर बेचिरहेका छन् भने कतिपय अझै बजार तल झर्ने आशंका गर्दै पर्खिरहेका छन्।
तर बजारमा सकारात्मक संकेत पनि छन्। धेरै बैंक र कम्पनीहरूले लाभांश घोषणा गर्ने समय नजिकिँदैछ। यससँगै ब्याजदर घटिरहेको, वित्तीय विवरण अघिल्लो वर्षभन्दा सुधारिएको, नीतिगत सुधार जारी रहेको जस्ता पक्षहरूले बजारलाई दीर्घकालीन आधारमा स्थिर बनाउन सक्ने विश्लेषण गरिएको छ।
यस बीचमा, नेपाल पुनर्बीमा, हिमालयन रिइन्स्योरेन्स, हिमालयन डिस्टिलरी, युनियन हाइड्रोपावर, एभरेस्ट बैंक, शिवम् सिमेन्टजस्ता कम्पनीमा सबैभन्दा बढी कारोबार भएको छ। लगानीकर्तामाझ झापा इनर्जीको आईपीओ चर्चामा छ, जसमा २४ भदौसम्म आवेदन दिन सकिन्छ। साथै, शिवश्री र खानीखोला हाइड्रोपावरको हकप्रद सेयर पनि खुलेका छन्।
