१६ साउन, काठमाडौं — कृषि तथा पशुपन्छी विकासमन्त्री रामनाथ अधिकारीले नेपाली भान्सामा कोदोको परिकारलाई एक छाकको रूपमा समावेश गर्न आग्रह गरेका छन्।
भक्तपुरको चाँगुनारायणमा सम्पन्न ‘राष्ट्रिय कोदो दिवस’ अवसरको कार्यक्रममा बोल्दै उनले कोदोको पोषणीय महत्त्व औंल्याउँदै यसको नियमित सेवन स्वास्थ्यका लागि लाभदायक हुने बताएका हुन्।
मन्त्री अधिकारीले भने, “हामीमध्ये कतिपय अहिले त रोग लागेपछि उपचार गराइरहेका छौँ, तर हाम्रो भविष्यको पुस्ता जन्मजातै कमजोर हुन सक्ने खतरा छ। रोग नल्याउने उपाय भनेकै जीवनशैली सुधार र आहार सन्तुलन हो, त्यसमा कोदोको भूमिका उल्लेखनीय हुन सक्छ।”
उनले मकै, धान र गहुँ जस्तै कोडोलाई पनि राष्ट्रिय महत्वको अन्नको रूपमा लिनुपर्नेमा जोड दिए। “कोदो पनि अन्य बालीसरह महत्वपूर्ण छ, यसको वैज्ञानिक खेती, प्रवर्द्धन र बजारिकरणमा ध्यान दिन जरुरी छ,” उनले स्पष्ट पारे।
कार्यक्रममा कृषिविद्हरूले पनि कोदोमा पाइने फाइबर, आइरन र अन्य पोषकतत्वहरूलाई महत्व दिँदै यसलाई विशेष गरी मधुमेह र पेटसम्बन्धी समस्याका लागि उपयोगी मानिएको बताए।
राष्ट्रिय कोदो दिवसको अवसरमा आयोजना गरिएको रोपाईं कार्यक्रममा कृषकहरूको समेत उल्लेख्य सहभागिता देखिएको थियो।
