काठमाडौँ, साउन २६ – काठमाडौँ महानगरपालिकाले बर्खायाममा पानीजन्य रोगको जोखिम कम गर्न प्रशोधित पिउने पानीको जारहरूको अनुगमन क्रियाकलाप तीव्र बनाएको छ।
एक हप्ताको अवधिमा विभिन्न ठाउँहरूमा गरिएको निरीक्षणमा मापदण्डविपरीत २७१ वटा जार फेला परेपछि तिनलाई जफत गरी नष्ट गर्न महानगर प्रहरीलाई जिम्मा दिएको छ। साथै, आषाढ र श्रावण महिनामा १३९ वटा सवारीबाट ४५६ वटा जार बरामद भई नष्ट गरिएको छ।
महानगरपालिकाले बल्खु, चाबहिल–चुच्चेपाटी, माछापोखरी–बालाजु, कोटेश्वर लगायतका क्षेत्रमा अनुगमन गर्दै खानेपानी बोक्ने सवारी साधनहरूको गुणस्तर जाँच गरेको छ। मापदण्ड विपरीतका जारहरू बिक्री वितरण नगर्न, स्पष्ट लेबल राख्न, कम्पनीले जारी गरेको बिल–बिजक सवारीसाधनमै राख्न तथा पानीको गुणस्तरमा संवेदनशील हुन कम्पनीहरूलाई निर्देशन दिइएको छ।
अनुगमनमा फेला परेका केही जार कुच्चिएको, फुटेको र अपारदर्शी अवस्थामा थिए जसले पानीको गुणस्तर र स्वास्थ्यमा नकारात्मक असर पार्न सक्ने भएकाले नष्ट गरिएको हो। साथै, केही नमुना भौतिक तथा जैविक परीक्षणका लागि प्रयोगशालामा पठाइएको छ र पानीको शुद्धता सुनिश्चित गर्न परीक्षण भइरहेकै छ।
फुड टेक्नोलोजिस्टहरूले पनि पानीको गुणस्तर परीक्षणको महत्त्व औँल्याउँदै नागरिकको स्वास्थ्यलाई प्राथमिकता दिइने बताएका छन्। महानगरपालिकाले वर्षा याममा प्रशोधित पानी उमालेपछि मात्रै पिउने सुझाव पनि दिएको छ। यसरी अनुगमन र नियन्त्रणको माध्यमबाट पानीजन्य रोगको जोखिम न्यूनिकरण गर्न र जनस्वास्थ्य संरक्षणमा जोड दिएको अवस्था देखिएको छ।
