काठमाडौं, भदौ ७ — इजरायलका रक्षामन्त्री काट्जले हमासले हतियार नबिसाए र बन्धकलाई तत्काल रिहा नगरे गाजालाई पूर्णरूपमा ध्वस्त पार्ने चेतावनी दिएका छन्।
यसअघि कतार र इजिप्टको मध्यस्थतामा हमासले ६० दिने युद्धविराम प्रस्ताव स्वीकार गर्दै आधा बन्धकलाई रिहा गर्ने सहमति जनाएको थियो। तर रक्षामन्त्री काट्जले यदि हमासले शर्त पूरा नगरे गाजाको अवस्था राफा र बेत हनून जस्तै खण्डहरमा परिणत हुने चेतावनी दिएका छन्।
इजरायली प्रधानमन्त्री बेन्जामिन नेतन्याहूले बन्धक रिहाइ र स्वीकार्य शर्तहरू पूरा भए युद्धलाई अन्त्य गर्न वार्ता गर्न सकिने बताएका छन्। इजरायली सैन्य आक्रमणका कारण पछिल्ला दिनमा राफा र बेत हनून क्षेत्र पूर्णरूपमा ध्वस्त भएका छन्। नेतन्याहूले यसअघि युद्धविराम र अप्रत्यक्ष वार्ताका प्रयास असफल भएपछि गाजामा आक्रमण तीव्र पार्दै पूर्ण नियन्त्रण कायम गर्ने घोषणा गरिसकेका छन्।
अन्तर्राष्ट्रिय दबाव र घरेलु विरोधका बीच पनि इजरायल सरकारले गाजामा आफ्नो नियन्त्रण कायम राख्ने दाबी गर्दै सैन्य कदम अघि बढाएको छ। हाल, गाजामा नागरिक र बन्धकहरूको सुरक्षाको अवस्था संवेदनशील रहेको र युद्धको तीव्रता अझ बढ्न सक्ने अवस्था छ।
