काठमाडौं, साउन १७ — नेकपा (माओवादी केन्द्र) का उपमहासचिव वर्षमान पुनले हाल जारी स्थायी समिति बैठकले पार्टीभित्रको मतभेद समाधान गर्दै एकताको दिशामा निर्णायक कदम चाल्ने विश्वास व्यक्त गरेका छन्।
किसान नेता भीमदत्त पन्तको ३२औं स्मृति दिवसका अवसरमा आयोजित कार्यक्रममा बोल्दै उनले माओवादी आन्दोलनमा भएको त्याग, बलिदान र योगदानको सम्मान गर्दै सबै नेताहरूले त्यसको ऐतिहासिक जिम्मेवारी लिनुपर्ने स्पष्ट पारे।
उनका अनुसार आन्दोलनबाट प्राप्त उपलब्धिहरू केवल कुनै पार्टी विशेषका लागि होइनन्, जनताको अधिकार र राज्यको रूपान्तरणका लागि भएको प्रयास हो। “नेताहरूलाई जति रिस उठे पनि दायाँबायाँ गर्न र भाग्न पाइँदैन,” पुनले भने, “इतिहासको जिम्मेवारी नलिने व्यक्ति सच्चा नेता हुन सक्दैन।”
पुनले नेताहरूलाई आत्मसमीक्षा गर्न र पार्टीभित्रको आलोचना तथा बहसलाई मर्यादित र जनवादी ढंगले अघि बढाउन आह्वान गरे। उनले जनार्दन शर्माको नेतृत्वसम्बन्धी सार्वजनिक भनाइलाई इङ्गित गर्दै स्थायी समिति बैठकमै त्यसबारे छलफल भइरहेको पनि जानकारी दिए।
कार्यक्रममा उनले अध्यक्ष पुष्पकमल दाहाल ‘प्रचण्ड’लाई ‘युगनायक’को रूपमा चित्रण गर्दै गणतन्त्र, समावेशीता र सामाजिक न्यायको आन्दोलनमा उनको नेतृत्व निर्णायक रहेको बताए। “३ सय वर्षे सामन्ती राजतन्त्र अन्त्य गरेर आधुनिक गणतन्त्र स्थापनाको नेतृत्व प्रचण्डकै थियो,” उनले भने, “यद्यपि वर्गीय स्वार्थका कारण अन्य दलहरूले सार्वजनिक रूपमा त्यो स्वीकार गर्न नसके पनि इतिहासले प्रचण्डलाई युगपरिवर्तनको नायकका रूपमा स्थापित गर्नेछ।”
उनले बाह्य शक्तिहरू र विपक्षी दलहरूबाट माओवादी पार्टीलाई टुक्र्याउने षड्यन्त्र भइरहेकाले सबै नेताहरू र कार्यकर्ताहरू सचेत हुनुपर्नेमा जोड दिए। “हाम्रो त्याग, तपस्या र बलिदानलाई कमजोर पार्ने प्रयत्न सफल हुन दिनु हुन्न,” उनले स्पष्ट पारे।
अन्त्यमा, पुनले पार्टीभित्रको एकतालाई बलियो पार्दै रूपान्तरणको यात्रालाई निरन्तरता दिन सबै तहका नेताहरूले जिम्मेवारीपूर्वक भूमिका निर्वाह गर्नुपर्ने र आन्दोलनको भावना बिर्सन नहुने सन्देश दिए।
