काठमाडौं, भदौ १५ — कृषि तथा पशुपन्छी विकासमन्त्री रामनाथ अधिकारीले निकट भविष्यमा मल अभाव नहुने दाबी गरेका छन् । कपिलवस्तुको चन्द्रौटामा आयोजित एक कार्यक्रममा उनले भारतको कोलकाताबाट आयात भइरहेको युरिया मल करिब एक सातादेखि १० दिनभित्र नेपाल आइपुग्ने र किसानलाई सहज रूपमा उपलब्ध गराइने जानकारी दिए ।
उनका अनुसार सरकारले मल अभावका कारण किसानलाई खेतीपातीमा समस्या नहोस् भन्ने उद्देश्यले वितरण प्रणालीलाई थप प्रभावकारी बनाउने तयारी गरेको छ । उनले भने, “मल वास्तविक कृषकलाई प्राथमिकता दिएर वितरण गर्नुपर्छ, ठूलो भूभागमा खेती गर्ने किसानले अभावका कारण क्षति बेहोर्नु नपरोस् भन्नेमा सरकार गम्भीर छ।”
कार्यक्रममा नेपाली कांग्रेसका जिल्ला सभापति तथा महाराजगञ्ज नगरपालिकाका प्रमुख अब्दुल कलामले सरकारी मल वितरण प्रणाली अझ पारदर्शी र व्यवस्थित बनाउनुपर्नेमा जोड दिए । सोही अवसरमा कांग्रेसका जिल्ला उपसभापति उमाकान्त खनालले आगामी वर्षदेखि मल, बीउलगायत कृषि सामग्री वर्षायाम सुरु हुनुअघि नै किसानको हातमा पुर्याउनुपर्ने सुझाव दिएका छन् ।
