नेपाल पर्यटन बोर्डले संयुक्त राष्ट्रसङ्घीय विकास कार्यक्रम (युएनडिपी) नेपालसँगको सहकार्यमा ‘नेपाल ट्राभल स्पेसलिस्ट–बेसिक लेभल’ नामक अनलाइन पाठ्यक्रम सुरु गरेको छ। यस पाठ्यक्रमको उद्देश्य पर्यटन पेसाकर्मीहरूको ज्ञान, दक्षता र सेवा गुणस्तर अभिवृद्धि गर्नु हो।
काठमाडौँमा आयोजित हिमालयन ट्राभल मार्टको उद्घाटन समारोहमा संस्कृति, पर्यटन तथा नागरिक उड्डयनमन्त्री बद्रीप्रसाद पाण्डेले अनलाइन तालिमको औपचारिक शुभारम्भ गरेका थिए। पाटा नेपाल, नेपाल एयरलाइन्स र अन्य निजी क्षेत्रको सहकार्यमा आयोजना गरिएको तीनदिने मार्ट यही दिन सम्पन्न हुँदैछ।
यो अनलाइन पाठ्यक्रमले नेपालका भौगोलिक, सांस्कृतिक र जैविक विविधता, ट्रेकिङ, साहसिक यात्रा, सांस्कृतिक सम्पदा, वेलनेस पर्यटन, दिगो पर्यटनका सिद्धान्त, गन्तव्य संरक्षण, जिम्मेवार यात्रा अभ्यास, जलवायु लचकता, ग्राहक सेवा सीप र आगन्तुकसँगको प्रभावकारी संलग्नता जस्ता विषयहरू समेटेको छ।
नेपाल सरकारले सन् २०३२ सम्म ३५ लाख विदेशी पर्यटक भित्र्याउने लक्ष्य राखेको ‘पर्यटन दशक’ रणनीतिअनुसार मानव संसाधन विकासमा लगानी गर्दै आएको छ। यसै सन्दर्भमा बोर्डले सन् २०२५ देखि २०२८ सम्म सञ्चालन हुने ‘सस्टेनेबल टुरिज्म प्रोजेक्ट’ अन्तर्गत २५०० रोजगारी सिर्जना गर्ने र ५००० जनालाई पर्यटनसम्बन्धी सीप अभिवृद्धि तालिम दिने लक्ष्य लिएको छ।
विशेषगरी महिला र सीमान्तकृत समुदायहरूलाई लक्षित गरी स्थानीय तहमा पूर्वाधार सुधार, डिजिटल नवप्रवर्तन र गन्तव्यहरूको क्षमता विकासमार्फत परियोजना कार्यान्वयन गरिनेछ। यसले दिगो, समावेशी र स्थानीय स्रोतमा आधारित पर्यटन प्रवर्द्धन गर्दै आर्थिक वृद्धिमा योगदान पुर्याउने बोर्डको विश्वास छ।
