काठमाडौं — नेपाली चलचित्र ‘आँखा’ ले इटालीमा आयोजित अन्तर्राष्ट्रिय पोलिस अवार्ड आर्ट फिल्म फेस्टिभलमा दुईवटा प्रतिष्ठित अवार्ड जितेको छ। यो फेस्टिभलको २९औं संस्करणमा ‘आँखा’ ले उत्कृष्ट ड्रामा र उत्कृष्ट अभिनेत्रीको पुरस्कार प्राप्त गरेको हो। उत्कृष्ट अभिनेत्रीको अवार्ड स्मिता लामिछानेले हात पारिन्।
फिल्मका निर्देशक जोन योन्जनले यो उपलब्धि नेपाली चलचित्र क्षेत्रका लागि ठूलो गर्वको विषय भएको बताए। उनले नेपाली कथावस्तु, अभिनय र सिर्जनालाई अन्तर्राष्ट्रिय स्तरमा मान्यता मिल्नु निकै महत्वपूर्ण रहेको बताए।
‘आँखा’ मा विजय बराल, स्मिता लामिछाने, निशा अधिकारी, बुद्धि तामाङ, आर के मेहता, र पशुपति राई लगायतका कलाकारहरूको अभिनय देख्न सकिन्छ। यो चलचित्रले नेपालका विभिन्न फेस्टिभलहरूमा पनि पुरस्कारहरू जितिसकेको छ।
निर्देशकको अनुसार, चलचित्रको सार्वजनिक प्रदर्शन प्राकृतिक प्रकोपको समयमा भएकाले अपेक्षित दर्शक संख्यामा पुग्न सकेन। तर, अन्तर्राष्ट्रिय फेस्टिभलमा प्राप्त सफलता नेपाली फिल्म उद्योगको लागि उत्साहजनक खबर रहेको छ। आगामी सेप्टेम्बरमा यस फिल्मको वितरण हुने तयारी छ।
