काठमाडौं, भदौ १७ — नेपाल स्टक एक्सचेन्ज (नेप्से) मा लाभांश सिजन सुरु भए पनि बजारमा अपेक्षित उत्साह देखिएको छैन । सूचीकृत कम्पनीहरूले गत आर्थिक वर्षको नाफाबाट सेयरधनीलाई लाभांश घोषणा गर्न थालेका छन् ।
तर, लगानीकर्ताको मनोबल बढ्नुको सट्टा बजार सूचक झन् ओरालो लागेको छ । सामान्यतया लाभांश घोषणा हुनेबित्तिकै बजारमा सकारात्मक लहर आउँथ्यो तर यस पटकको परिदृश्य पूर्ण रूपमा विपरीत बनेको छ ।
विशेषज्ञहरूका अनुसार बजारमा दीर्घकालीन लगानीकर्ताभन्दा पनि छोटो समयमै नाफा खोज्ने कारोबारी हावी भएका कारण सूचक कमजोर बनेको हो । त्यसमाथि उधारो र ऋणमा आधारित सेयर खरिद–बिक्रीको उच्च प्रभावले बजारलाई थप दबाबमा पारेको छ । परिणामस्वरूप लाभांश घोषणा भए पनि नेप्सेमा सुधार आउने संकेत देखिएन ।
मंगलबार कारोबार सुरु हुँदा २७६१.८६ अंकमा रहेको नेप्से सूचक दिनभरमा १९.८९ अंकले घटेर २७४१.९७ अंकमा झरेको छ । सूचकसँगै कारोबार रकम पनि घटेर करिब ३ अर्ब ४३ करोड रुपैयाँमा सीमित रह्यो । अघिल्लो दिन सोमबार बजारमा ५ अर्बभन्दा बढीको कारोबार भएको थियो भने आइतबार ३१ अंकको गिरावटपछि सोमबार १२ अंकले वृद्धि भएको थियो । तर, मंगलबार फेरि बजारमा गिरावट आउँदा लगानीकर्ताको आत्मविश्वास कमजोर बनेको छ ।
सो दिन कारोबार भएका सबै समूहगत सूचकहरूमा गिरावट आएको छ । बैंकिङ, विकास बैंक, वित्त, होटल तथा पर्यटन, जलविद्युत्, जीवन बीमा, उत्पादनमूलक, लघुवित्त, निर्जीवन बीमा, व्यापार, सामूहिक लगानी कोष र अन्य समूह सबै राताम्य बने । उत्पादनमूलक, निर्जीवन बीमा र व्यापार समूहमा सबैभन्दा ठूलो गिरावट आएको थियो । यसले बजारमा समग्र बेच्ने दबाब प्रष्ट देखाएको छ ।
मंगलबार ३२३ कम्पनीका ८९ हजारभन्दा बढी कारोबारमार्फत १ करोड ५ लाखभन्दा बढी कित्ता सेयर किनबेच भएको थियो । यसबाट करिब ३ अर्ब ४३ करोड रुपैयाँ बराबरको कारोबार भएको नेप्सेले जनाएको छ । कारोबार संख्या सामान्य भए पनि रकममा आएको कमी बजारमा लगानीकर्ताको सावधानी देखिने संकेत भएको विश्लेषकहरूको टिप्पणी छ ।
समग्रमा हेर्दा लाभांश घोषणा हुँदा पनि बजार कमजोर हुनु लगानीकर्ताको व्यवहारजन्य प्रवृत्ति र अल्पकालीन नाफामुखी सोचको परिणाम भएको बताइन्छ । दीर्घकालीन लगानीमा ध्यान नदिने र ऋणमा आधारित सेयर कारोबारको परम्परा बढिरहेकाले आगामी दिनमा पनि बजारमा स्थायित्व आउन कठिन हुने विश्लेषकहरूको निष्कर्ष छ ।
