काठमाडौं, ३० जेठ — काठमाडौंको ऐतिहासिक धर्मपथ क्षेत्रमा शुक्रबार विशेष सांस्कृतिक कार्यक्रम ‘धर्मपथ महोत्सव’ सम्पन्न भयो। वडा नं. २३ को आयोजनामा भएको यस महोत्सवले परम्परागत कला, संस्कृति र स्थानीय उत्पादनलाई उजागर गर्ने उद्देश्य बोकेको थियो।
महोत्सवको आकर्षणमध्ये स्थानीय गुठी संस्थाहरू र खलः समूहहरूद्वारा प्रस्तुत गरिएको नेवारी बाजा, नृत्य तथा सांगीतिक कार्यक्रम प्रमुख थिए। कार्यक्रममा लोकप्रिय कुटुम्ब ब्यान्डको विशेष प्रस्तुति पनि रहेको थियो, जसले दर्शकहरूलाई रमाइलो वातावरणमा डुबायो।
महोत्सवमा रैथाने नेवारी परिकारका स्टलहरू राखिएका थिए, जहाँ परम्परागत स्वादका खानाहरू उपलब्ध थिए। त्यस्तै, हस्तकलाका विभिन्न कलात्मक वस्तुहरू पनि प्रदर्शनीमा राखिएका थिए, जसले स्थानीय हस्तकला र सांस्कृतिक धरोहरलाई उजागर गरेको थियो। यस महोत्सवले धर्मपथ क्षेत्रको सांस्कृतिक समृद्धि र स्थानीय समुदायको कलात्मक प्रतिभालाई प्रर्दशन गर्ने अवसर प्रदान गर्यो।
स्थानीय समुदायको सक्रिय सहभागिता र ऐतिहासिक स्थानको सांस्कृतिक पुनर्जीवनमा टेवा दिने उद्देश्यले आयोजना गरिएको महोत्सवमा उल्लेख्य भीड देखिएको थियो। आयोजकको भनाइमा, यस्तो प्रकारको कार्यक्रमले पर्यटन प्रवर्द्धन र सांस्कृतिक सम्पदा संरक्षणमा सहयोग पुर्याउनेछ।
