काठमाडौं, भदौ १५ — राष्ट्रिय स्वतन्त्र पार्टी (रास्वपा) ले रुपन्देही–३ मा हुने उपनिर्वाचनका लागि आजै आधिकारिक उम्मेदवार टुंग्याउने भएको छ ।
पार्टी स्रोतका अनुसार प्रतिस्पर्धामा रहेका नौ नेतामध्ये प्राथमिक निर्वाचन (प्राइमरी) को परिणामको आधारमा एक जनालाई उम्मेदवार घोषणा गरिनेछ । आज बिहान ११ बजे प्रतिस्पर्धी नेताहरू नख्खु कारागार पुगेर सभापति रवि लामिछानेलाई भेट्ने कार्यक्रम तय भएको छ ।
उम्मेदवार छनोटसँगै पार्टीको सचिवालय बैठक पनि दिउँसो १:३० बजे बस्नेछ । बैठकपछि रुपन्देही–३ को उपनिर्वाचनमा पार्टीको आधिकारिक उम्मेदवारको नाम सार्वजनिक गरिने जनाइएको छ ।
रुपन्देही–३ मा कार्तिक १७ गते उपनिर्वाचन हुँदैछ । यसलाई लिएर रास्वपाले विशेष चासो दिएको छ र आन्तरिक प्रतिस्पर्धा उच्च रहँदै आएको छ ।
