काठमाडौं, भदौ ३० — सरकारले आजदेखि चाडपर्व लक्षित सहुलियत पसल सञ्चालनमा ल्याएको छ। थापाथलीस्थित खाद्य व्यवस्था तथा व्यापार कम्पनीको प्रादेशिक कार्यालयबाट यस वर्ष दशैं–तिहारको अवसरमा ५१ प्रकारका खाद्यान्न तथा मसलाजन्य वस्तु बिक्रीमा राखिएको छ। सहुलियत पसल सुरु गर्दा जेनजी आन्दोलनका कारण यस वर्ष कुनै विशेष तामझाम नगरी सामान्य रूपमा बिक्री वितरण सुरु गरिएको हो।
प्रमुख धर्मकुमारी राजवंशीका अनुसार चामल, गहुँ, दाल र केराउमा प्रतिकेजी ५ रुपैयाँ छुट दिइएको छ भने चिनीमा पनि समान छुट छ। चिउरा, आटा, पिठो, धनियाँ र तेलमा ७ रुपैयाँसम्म, सिमी, फापर, चिनो, कागुनो, उवा, मार्सी र बासमतिमा १० रुपैयाँसम्म छुट उपलब्ध गरिएको छ। यस कार्यालय अन्तर्गत रामशाह पथ, नख्खु र दक्षिणकालीका बिक्री कक्षमार्फत पनि सामान बिक्री हुँदैछ।
