१५ असार, काठमाडौं — कृषि तथा पशुपन्छी विकासमन्त्री रामनाथ अधिकारीले किसानको हितमा सरकार पूर्ण रूपमा प्रतिबद्ध रहेको बताएका छन्। उनले राष्ट्रिय धान दिवस तथा रोपाइँ महोत्सव २०८२ को अवसरमा खुमलटारमा आयोजित कार्यक्रममा स्रोत र साधनको सीमितता भए पनि सरकारले किसानका लागि आवश्यक सहयोग र ध्यान दिने प्रतिबद्धता जनाए।
मन्त्री अधिकारीले धान खेतीमा आत्मनिर्भर बन्ने लक्ष्य राखिएको उल्लेख गर्दै, “चैते धानको जस्तो मिठो चामल अरू कुनै हुँदैन। हामी दुई वर्षभित्र धानमा आत्मनिर्भर हुनेछौं,” भने। उनले मलको अभावका कारण रोपाइँमा समस्या आउन नदिन आवश्यक व्यवस्थापन गरिएको जानकारी दिए।
सङ्घीय संसद्को कृषि, सहकारी तथा प्राकृतिक स्रोत विकास समितिका सभापति कुसुम थापाले पनि किसानलाई सबल बनाउँदै देशलाई खाद्य आत्मनिर्भर बनाउन नीतिगत छलफलमार्फत सरकारलाई निर्देशन दिने प्रतिबद्धता व्यक्त गरे।
मन्त्रालयका सचिव दीपककुमार खरालले कृषिमा किसानको योगदानलाई सम्मान गर्दै धान उत्पादन, खपत र निर्यातमा वृद्धि गरी आयात घटाउनुपर्नेमा जोड दिए। उनले भूउपयोग नीतिका कारण खेतीयोग्य जमिन आवासीय क्षेत्रमा परिणत हुँदै गएको समस्या समाधान गर्नुपर्ने बताए।
नेपाल कृषि अनुसन्धान परिषद्का कार्यकारी निर्देशक कृष्णप्रसाद तिम्सिनाले धानलाई नेपाली जीवनशैली र संस्कृतिको अभिन्न अङ्ग भने। जलवायु परिवर्तनसँग जुध्दै विभिन्न जातका धान विकास भइरहेको र सन् २०३० सम्म नेपाललाई धानमा आत्मनिर्भर बनाउने तयारी भइरहेको जानकारी दिए।
यसरी सरकारले किसानहरूको उत्पादन क्षमता वृद्धि र आत्मनिर्भरता हासिल गर्न विभिन्न तहमा काम गरिरहेको छ।
