काठमाडौं, भदौ १ — त्रिभुवन अन्तर्राष्ट्रिय विमानस्थलबाट विदेश जाने यात्रुलाई अब कम्तीमा एक घण्टा अघि अध्यागमन डेस्कमा उपस्थित हुनुपर्ने भएको छ । अध्यागमन विभागका अनुसार अन्तिम समयमा यात्रुहरूको चाप बढ्दा आवश्यक कागजात जाँच र प्रक्रिया पूरा गर्न कठिनाइ हुने भएकाले यस्तो व्यवस्था लागू गरिएको हो ।
महानिर्देशक रामचन्द्र तिवारीले विशेष गरी रातिको समयमा खाडी मुलुकतर्फ जाने यात्रु बढी हुने भएकाले अध्यागमनमा भीड बढ्ने बताउँदै, समयमै उपस्थित नभए यात्रु स्वयंलाई समस्या हुने बताएका छन् । उनका अनुसार जाँच अधिकारीलाई समेत कम समयमा सबै प्रक्रिया पूरा गर्न कठिन हुने भएकाले यात्रुलाई कम्तीमा एक घण्टा अगाडि उपस्थित गराउने निर्णय गरिएको हो ।
यस विषयमा अध्यागमन विभागले विमानस्थलमा सेवा दिने एयरलाइन्स कम्पनी तथा सरोकारवाला निकायहरूसँग छलफल गरेर सहमति जुटाएको छ । नागरिक उड्डयन प्राधिकरणलाई पनि रातिको उडान तालिका आवश्यक परेमा लचिलो बनाउन आग्रह गरिएको छ ।
हालै विमानस्थल अध्यागमनमा कर्मचारीको मिलेमतोमा अवैध ढंगले नेपाली युवा वैदेशिक रोजगारीमा पठाउने गिरोहबारे छानबिन सुरु भएको छ । यस क्रममा तत्कालीन विमानस्थल प्रमुख तीर्थराज भट्टराई पक्राउ परेपछि गृह मन्त्रालयले नयाँ सहसचिवलाई जिम्मेवारी दिएको थियो । त्यसपछि अध्यागमन प्रमुखमा नरहरि घिमिरे र महानिर्देशकमा रामचन्द्र तिवारी नियुक्त भएका छन् ।
यद्यपि, भिजिट भिसाको नाममा ठगी र असुली गर्ने कार्य अझै रोकिएको छैन भन्ने गुनासो आउने क्रम जारी छ । यसै कारण अध्यागमन प्रक्रियामा कडाइ गर्दै यात्रुलाई समयमै उपस्थित गराउन सरकार सचेत भएको हो ।
