काठमाडौं, २८ भदौ । राष्ट्रिय स्वतन्त्र पार्टी (रास्वपा) की नेता र पूर्व शिक्षामन्त्री सुमना श्रेष्ठले सुशीला कार्की नेतृत्वको नयाँ अन्तरिम सरकारमा सहभागी नहुने स्पष्ट पारेकी छन्। शुक्रबार साँझ शीतल निवासमा प्रधानमन्त्री कार्कीको शपथ ग्रहण कार्यक्रममा सहभागी भए पनि कतिपयले सुमना पनि मन्त्री बन्ने सम्भावना राखेको अनुमान गरेका थिए।
तर फेसबुक लाइभ मार्फत बोल्दै सुमनाले आफूप्रति फैलिएको भ्रम हटाइन्। उनले भनिन्, “भ्रममा कोही पनि नपरून्। म क्याबिनेटमा जान चाहन्न।” उनले जोड दिँदै भनिन् कि युवा बलिदान र आन्दोलनले ल्याएको परिवर्तनका अवसरलाई व्यक्तिगत लाभ वा पदका लागि प्रयोग गर्नु हुँदैन। उनका अनुसार, “कलिला भाइबहिनीहरूको दाहसंस्कार सकिएको छैन। त्यस बलिदानबाट आएको परिवर्तनमा हामीले आफ्नो काम गर्ने अवसर पाएर पनि मन्त्री बन्ने सपना नराखौं।”
सुमनाले युवाहरूको बलिदानलाई परिवर्तनको केन्द्रमा राख्दै, सत्ता होइन सेवा र कुर्सी होइन कर्ममा ध्यान दिन सबैमा आग्रह गरेकी छन्। उनले कार्की सरकारलाई शुभकामना दिँदै भनिन्, “अब हामीले नाम होइन काममा ध्यान दिनुपर्छ। यो परिवर्तन सफल बनाउन हामी पछाडि बसेर सहयोग गर्नेछौं।”
