काठमाडौं, असोज १ — हाल मनसुन पुनः सक्रिय भएको छ र यसले अबको करिब १५ दिनमा पनि वर्षा गराउने सम्भावना रहेको छ। मौसम पूर्वानुमान अनुसार बागमती, लुम्बिनी र अन्य पहाडी तथा तराईका केही स्थानमा मध्यमदेखि भारी वर्षा हुने अनुमान छ।
जल तथा मौसम विज्ञान विभागका विशेषज्ञहरूले मनसुन सामान्यतया अक्टोबर २ सम्म बहिर्गमन गर्ने भए पनि यस वर्ष यस समय पुनः सक्रिय भएको बताएका छन्। मौसमविद् रोजन लामिछानेका अनुसार, देशभर मौसम बदली रहनेछ र केही क्षेत्रमा भारी वर्षाको सम्भावना रहेको छ। यससँगै नदीहरूमा पानीको बहाव बढ्ने सम्भावना पनि रहेको विभागले जनाएको छ।
बाढीविद् विनोद पराजुलीले दोलखा, सिन्धुपाल्चोक, पाल्पा, रुपन्देही, नवलपरासी, डोटी, कैलाली र आसपासका स–साना नदीहरूमा बहाव उल्लेख्य बढ्ने र आकस्मिक बाढीको मध्यम जोखिम रहने भएकाले स्थानीयवासीलाई सतर्क रहन आग्रह गरेका छन्।
विशेष गरी इलाम, झापा, मोरङ, काठमाडौँ, ललितपुर, भक्तपुर, बारा, पर्सा, चितवन, कास्की, तनहुँ, स्याङ्जा, म्याग्दी, बाग्लुङ, पर्वत, गुल्मी, अर्घाखाँची, बाँके, बर्दिया, दाङ, सुर्खेत, दैलेख, कञ्चनपुर, डडेलधुरा, बैतडी र दार्चुला लगायतका जिल्लाहरूमा बहने नदी तटीय क्षेत्रका बासिन्दाहरूले आवश्यक सतर्कता अपनाउनुपर्ने विभागको चेतावनी छ।
सरकार र सम्बन्धित निकायहरूले नदी किनार र जोखिमयुक्त क्षेत्रका बासिन्दालाई सुरक्षित स्थानमा बस्न र आकस्मिक तयारी अपनाउन सूचित गरिसकेका छन्।
